साँफेबगर ।
नेकपा एमाले साँफेबगर नगर कमिटीले आगामि बैशाख ३० गते हुने स्थानीय तहको निर्वाचनका लागि प्रतिवद्धता पत्र सार्वजनिक गरेको छ। नगर कमिटीले सार्वजनिक गरेको १२ पेजको प्रतिवद्धतामा साँफेबगर नगरपालिकालाई सुखी र समृद्ध नगरवासीको सरोकार लक्ष्य सहित सहितको प्रतिवद्धता पत्र सार्वजनिक गरीएको छ।
प्रतिवद्धता पत्रमा नगरपालिकाको आवधिक योजना तथा विस्तृत विवरणको तर्जुमा र अद्यावधिक, स्नातक तह सम्मको प्राविधिक शिक्षालय स्थापना, पढ्दै कमाउँदै कार्यक्रमको अवलम्वन गर्दै व्यावहारिक तथा व्यवसायिक शिक्षामा प्राथामकिता, नगरको गौरवको योजनाको रुपमा नगर नमुना विद्यालय बनाउने समिटिएको छ। बयालपाटा अस्पताललाई नर्सिङ कलेज हुदै मेडिकल कलेज स्तरोन्ती का लागि संघ तथा प्रदेश सरकारसंग समन्वय तथा सहकार्य गर्ने, एक घर एक धारा नीतिको प्रभावकारी कार्यान्वयन, फोहोर व्यवस्थापनको लागि दीर्घकालिन गुरु योजना निर्माण, प्रत्येक टोलमा सिचाई पोखरी तथा आवश्यकता अनुसार साना, मझौला र ठुला कुला एवम नहरहरुको निर्माण, संघ र प्रदेश सरकारसंग समन्वय गरी ६० किलोमिटर कालो पत्रे र ७० किलोमिटर ग्राभेल सडक निर्माण तथा र ३० किलोमिटर कच्ची सडकको स्तरोन्नती, नगर बस संचालन गर्ने प्रतिवद्धता पत्रमा उल्लेख गरिएको छ।
संघ र प्रदेश सरकारसँगको सहकार्यमा जनता आवास, सुरक्षित आवास, विपद् पीडित आवास तथा दलित समुदायको आवासका कार्यक्रमको संचालन, एक वडा एक उत्पादन नीतिको तर्जुमा र कार्यान्वयन, एक वडा एक सहकारी सुपथ मूल्य पसलको संचालन, नयाँ शहर आयोजनासंगको समन्वय र सहकार्यमा बस्ति विकास कार्यक्रमको प्रभावकारी कार्यन्वयन, वैजनाथधाम, खप्तड, जिमराडी, धौलछडा, कालालेकी लगायत नगरमा रहेका सांस्कृति–धार्मिक स्थलहरुको संरक्षण र प्रवद्र्धनका लागि गुरुयोजना निर्माण र कार्यान्वयन गरिने उल्लेख गरिएको छ।
एक वडा एक खेल मैदान निर्माण, लैगिंक विभेदमा शून्य सहनशिलताको नीति अवलम्बन, भूमिहीन र सुकम्वासीहरुका लागि जग्गा उपलब्ध गराउन भूमि सम्बन्धी आयोगसंग समन्वय र सहकार्य, विदेशबाट फर्केका व्यक्तिहरूको ज्ञान, सिप र पूँजीको सदुपयोग सम्बन्धी कार्यक्रमको तर्जुमा र कार्यान्वयन, एक परिवार एक रोजगार कार्यक्रम सञ्चालन गरिने प्रतिवद्धता पत्रमा उल्लेख गरिएको छ। नगरपालिकाको आर्थिक तथा सामाजिक विकासका लागि निजि क्षेत्रको लगानी बढाउन उचित वातावरणको सिर्जना गर्ने, सार्वजनिक कार्यक्रम संचालन गर्न खुला मंच र सभास्थल निर्माण र सभा गृहको निर्माण गरिने प्रतिवद्धता पत्रमा उल्लेख गरिएको छ।
नेकपा एमाले साँफेबगर नगर कमिटीका उपाध्यक्ष ललित रैगाईको अध्यक्षतामा भएको कार्यक्रममा नेकपा एमाले साँफेबगर नगर कमिटी सचिव ललित बोगटीले प्रतिवद्धता पत्र वाचन गरेर सार्वजनिक गर्नु भएको थियो। बौद्धिक वर्गको समुहले थुप्रै परिवर्तन रुपि खाका सहित प्रतिवद्धता पत्र तयार भएकाले जनताको माझमा हरेक नयाँ कुरा चुनावमा एजेन्डाका साथ लिएर जानू पर्ने नेकपा एमाले साँफेबगर नगर कमिटीले जनाएको छ। नगर कमिटीले सार्वजनिक गरेको १२ पेजको प्रतिवद्धतामा साँफेबगर नगरपालिकाको मुहार फेर्ने लक्ष्य भावि योजना सहितको प्रतिवद्धता पत्र सार्वजनिक गरीएको छ।
प्रतिवद्धता पत्र सार्वजनिक कार्यक्रममा नेकपा एमाले सुदूरपश्चिम प्रदेश कमिटी सदस्य जयन्द्र बहादुर स्वार, जंग बि.क., नेकपा एमाले जिल्ला कमिटी सचिवालय सदस्य तथा संगठन विभाग प्रमुख प्रकाश शाह, नेकपा एमाले जिल्ला कमिटी सचिवालय सदस्य बालगिरी कुँवर, नेकपा एमाले जिल्ला कमिटी सचिवालय सदस्य तथा नगर प्रमुख पदका उम्मेदवार पशुपति कुँवर, नेकपा एमाले जिल्ला कमिटी सदस्य सुरत भुल, झंकर कुँवर, हिरिण्ड कुँवर, राधिका भुजेल, रबिन्द्र शाह, नेकपा एमालेका नेता तेज बहादुर कुँवर, ढकेन्द्र कुँवर, साँफेबगर नगर कमिटीका कार्यलय सचिव गणेश कुँवर, अनेरास्ववियुका जिल्ला कमिटी सचिव भिम बडाहित साँफेबगर स्थित विभिन्न संचार माध्यममा आवद्ध संचारकर्मीहरुको उपस्थिति रहेको थियो।
