साँफेबगर ।
नेपालका चार धाम मध्येको एक अछामको वैधनाथ धाममा संचालनमा रहेको कोटिहोम महायज्ञमा एक करोड ३८ लाख रुपैयाँ संकलन भएको छ।
बिहीबारसम्म उक्त रकम संकलन भएको बैधनाथ धाम कोटिहोम मुल आयोजक समितिका उपाध्यक्ष कुल बहादुर कुँवरले बताउनु भयो। कुँवरका अनुसार १६ गतेको बचत ५६ लाख, कृषि र नेपाल बैंकमा सिधै विभिन्न ठाउँबाट जम्मा भएको ६ लाख ७१ हजार, कोटिहोम स्थलमा उठेको नगद ५ लाख ८२ हजार सहित ६८ लाख नगद बचत रहेको छ।
पालिकाहरुले गरेको निर्णय अनुसारको ३७ लाख आउन बाँकी रहेको छ। संकलन भएको मध्ये ७० लाख रुपैयाँ खर्च भएको छ। १४४ बर्ष पछि लागेको कोटिहोममा आर्थिक संकलन हुने क्रम जारी रहेको छ भने खर्च समेत त्यहि प्रकारले भई रहेको आयोजकले जनाएको छ।
कोटिहोमको नवौँ दिनका सभानायक साँफेबगर नगरपालिका वडा नम्बर १ नवासी पूर्णचन्द्र जोशी रहनु भएको थियो। उहाँले एक लाख दुई हजार दुई सय दुई रुपैयाँ दान गर्नु भएको थियो। नवौँ दिनका प्रमुख अतिथि पूर्व राजदुत बल बहादुर कुँवर रहनु भएको थियो।
यस्तै कोटिहोममा मुल आयोजक समितिका अध्यक्ष तथा प्रतिनिधि सभा सदस्य शेर बहादुर कुँवर, उपाध्यक्ष खडक बहादुर खड्का, महासचिव देवराज उपाध्याय लगाएतको सहभगिता रहेको थियो। कोटिहोममा विभिन्न विद्यालयका झाँकी प्रदशर्न गरिएका थिए।
नवौँ दिनमा वेदान्ताचार्य प्राध्यापक भवानी प्रसाद खतिवडा र वालयोगेश्वर विजयमुर्ति महाराजले कथा वाचन गर्नु भएको थियो।
फाल्गुन १० गतेबाट सुरु भएको कोटिहोम महायज्ञ फागुन २५ गते महाशिवरात्रिका दिनसम्म चल्नेछ।
